16.02.2022
Milli Paralimpiya Komitəsinin prezidenti İlqar Rəhimovun qərarına əsasən “Pekin-2022” XIII Qış Paralimpiya Oyunlarında iştirak üçün Rauf Mürsəlov Azərbaycan komandasının şef-de-missionu, idmançımız Mehman Ramazanzadə isə açılış mərasimində millimizin bayraqdarı təyin edilib.
Bundan başqa Azərbaycan komandasının nümayəndə heyətinin tərkibində milli komandanın baş məşqçisi, Şahdağ Turizm Mərkəzinin xizək təlimatçısı Məhəmməd İsmayılov, və Komitənin qış idman növləri üzrə kuratoru, mətbuat katibi Azər Tapdıqov da yer alıb.
Qeyd edək ki, Milli Paralimpiya Komitəsinin qış idman növləri üzrə milli komandasının üzvü ilk dəfə olaraq Qış Paralimpiya Oyunlarında iştirak edəcək.
Azərbaycan Milli Paralimpiya Komandasının üzvü Mehman Ramazanzadə kross-kantri növünün “sprint” kateqoriyasında çıxış edəcək. İdmançımızın yarışı 09 mart 2022-ci il tarixində baş tutacaq.
XIII Qış Paralimpiya Oyunları 04-13 mart 2022-ci il tarixlərində Çin Xalq Respublikasının paytaxtı Pekin şəhərində keçiriləcək. Oyunların açılış mərasimi martın 4-ü Pekin Milli stadionunda baş tutacaq.